መጽሐፈ፡ተግሣጽ።

(ክለሳ.1.20020507)

_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡25።______________
ምዕራፍ፡25፤(1)፡
1፤እነዚህም፡ደግሞ፡የይሁዳ፡ንጉሥ፡የሕዝቅያስ፡ሰዎች፡የቀዷቸው፡የሰሎሞን፡ምሳሌዎች፡ናቸው።
2፤የእግዚአብሔር፡ክብር፡ነገርን፡መሰወር፡ነው፤የነገሥታት፡ክብር፡ግን፡ነገርን፡መመርመር፡ነው።
3፤እንደሰማይ፡ከፍታ፡እንደምድርም፡ጥልቀት፡የነገሥታት፡ልብ፡አይመረመርም።
4፤ከብር፡ዝገትን፡አስወግድ፥ፈጽሞም፡ይጠራል።
5፤ከንጉሥ፡ፊት፡ኃጥኣንን፡አርቅ፥ዙፋኑም፡በጽድቅ፡ትጸናለች።
6፤በንጉሥ፡ፊት፡አትመካ፥በታላልቆችም፡ስፍራ፡አትቁም፤
7፤ዐይኖችኽ፡ባዩት፡በመኰንን፡ፊት፡ከምትዋረድ።ወደዚህ፡ከፍ፡በል፡ብትባል፡ይሻልኻልና።
8፤ባልንጀራኽ፡ባሳፈረኽ፡ጊዜ፡ዃላ፡እንዳትጸጸት፡ለክርክር፡ፈጥነኽ፡አትውጣ፤
9፤ክርክርኽን፡ከባልንጀራኽ፡ጋራ፡ተከራከር፤የሌላ፡ሰው፡ምስጢር፡ግን፡አትግለጥ፥
10፤የሚሰማ፡እንዳይነቅፍኽ፥አንተንም፡ከማነወር፡ዝም፡እንዳይል።
11፤የወርቅ፡እንኮይ፡በብር፡ጻሕል፡ላይ፤የጊዜው፡ቃል፡እንዲሁ፡ነው።
12፤የምትሰማን፡ዦሮ፡የሚዘልፍ፡ጠቢብ፡ሰው፡እንደ፡ወርቅ፡ጕትቻ፡እንደሚያንጸባርቅም፡ዕንቍ፡እንዲሁ፡ነው።
13፤በመከር፡ወራት፡የውርጭ፡ጠል፡ደስ፡እንደሚያሠኝ፥እንዲሁ፡የታመነ፡መልእክተኛ፡ለላኩት፡ነው፤የጌታዎቹን ፡ነፍስ፡ያሳርፋልና።
14፤ስለ፡ስጦታው፡በሐሰት፡የሚመካ፡ሰው፡ዝናብ፡እንደማይከተለው፡ደመና፡ነፋስም፡ነው።
15፤በትዕግሥት፡አለቃ፡ይለዝባል፥የገራም፡ምላስ፡ዐጥንትን፡ይሰብራል።
16፤አጥብቀኽ፡እንዳትጠግብ፡እንዳትተፋውም፡ማር፡ባገኘኽ፡ጊዜ፡የሚበቃኽን፡ብላ።
17፤እንዳይሰለችኽ፡እንዳይጠላኽም፥እግርኽን፡ወደባልንጀራኽ፡ቤት፡አታዘውትር።
18፤በባልንጀራው፡በሐሰት፡የሚመሰክር፡እንደ፡መዶሻና፡እንደ፡ሰይፍ፡እንደ፡ተሳለም፡ፍላጻ፡ነው።
19፤ወስላታውን፡ሰው፡በመከራ፡ጊዜ፡መተማመን፡እንደ፡ተሰበረ፡ጥርስና፡እንደ፡ሰለለ፡እግር፡ነው።
20፤ለሚያዝን፡ልብ፡ዝማሬ፡የሚዘምር፥ለብርድ፡ቀን፡መጐናጸፊያውን፡እንደሚያስወግድ፡በቍስልም፡ላይ፡እንደ፡ መጻጻ፡እንዲሁ፡ነው።
21፤ጠላትኽ፡ቢራብ፡እንጀራ፡አብላው፥ቢጠማም፡ውሃ፡አጠጣው፤
22፤ፍም፡በራሱ፡ላይ፡ትሰበስባለኽና፥እግዚአብሔርም፡ዋጋኽን፡ይመልስልኻልና።
23፤የሰሜን፡ነፋስ፡ወጀብ፡ያመጣል፤ሐሜተኛ፡ምላስም፡የሰውን፡ፊት፡ያስቈጣል።
24፤ከጠበኛ፡ሴት፡ጋራ፡ባንድ፡ቤት፡ከመቀመጥ፡በሰገነት፡ማእዘን፡መቀመጥ፡ይሻላል።
25፤የቀዘቀዘ፡ውሃ፡ለተጠማች፡ነፍስ፡ደስ፡እንደሚያሠኝ፥ከሩቅ፡አገር፡የመጣ፡መልካም፡ምሥራች፡እንዲሁ፡ነው ።
26፤በኃጥእ፡ፊት፡የሚወድቅ፡ጻድቅ፡እንደደፈረሰ፡ፈሳሽና፡እንደ፡ረከሰ፡ምንጭ፡ነው።
27፤ብዙ፡ማር፡መብላት፡መልካም፡አይደለም፤እንዲሁም፡የራስን፡ክብር፡መፈላለግ፡አያስከብርም።
28፤ቅጥር፡እንደሌላት፡እንደ፡ፈረሰች፡ከተማ፥መንፈሱን፡የማይከለክል፡ሰው፡እንዲሁ፡ነው።
_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡26።______________
ምዕራፍ፡26፤(2)፡
1፤በረዶ፡በበጋ፡ዝናብም፡በመከር፡እንዳይገ፟ባ፟፥እንዲሁ፡ለሰነፍ፡ክብር፡አይገ፟ባ፟ውም።
2፤እንደሚተላለፍ፡ድንቢጥ፡ወዲያና፡ወዲህም፡እንደሚበር፟፡ጨረባ፥እንዲሁ፡ከንቱ፡ርግማን፡በማንም፡ላይ፡አይ ደርስም።
3፤ዐለንጋ፡ለፈረስ፥ልጓም፡ለአህያ፥በትርም፡ለሰነፍ፡ዠርባ፡ነው።
4፤አንተ፡ደግሞ፡ርሱን፡እንዳትመስል፡ለሰነፍ፡እንደ፡ስንፍናው፡አትመልስለት።
5፤ለራሱ፡ጠቢብ፡የኾነ፡እንዳይመስለው፡ለሰነፍ፡እንደ፡ስንፍናው፡መልስለት።
6፤በሰነፍ፡መልእክተኛ፡እጅ፡ነገርን፡የሚልክ፡እግሮቹን፡ይቈርጣል፡ግፍንም፡ይጠጣል።
7፤እንደሚንጠለጠሉ፡የዐንካሳ፡እግሮች፥እንዲሁም፡ምሳሌ፡በሰነፎች፡አፍ፡ነው።
8፤ለሰነፍ፡ክብርን፡የሚሰጥ፡ድንጋይን፡በወንጭፍ፡እንደሚያስር፡ነው።
9፤ሾኽ፡በስካር፡እጅ፡እንደሚሰካ፥እንዲሁ፡ምሳሌ፡በሰነፎች፡አፍ፡ነው።
10፤ዋና፡ሠራተኛ፡ዅሉን፡ነገር፡ይሠራል፤ሰነፍን፡የሚቀጥር፡ግን፡መንገድ፡ዐላፊውን፡እንደሚቀጥር፡ነው።
11፤ወደ፡ትፋቱ፡እንደሚመለስ፡ውሻ፡ስንፍናውን፡የሚደግም፡ሰው፡እንዲሁ፡ነው።
12፤ለራሱ፡ጠቢብ፡የኾነ፡የሚመስለውን፡ሰው፡አየኸውን፧ከርሱ፡ይልቅ፡ለሰነፍ፡ተስፋ፡አለው።
13፤ታካች፡ሰው፦አንበሳ፡በመንገድ፡አለ፤አንበሳ፡በጐዳና፡አለ፡ይላል።
14፤ሳንቃ፡በማጠፊያው፡ላይ፡እንደሚዞር፥እንዲሁ፡ታካች፡ሰው፡በዐልጋው፡ላይ፡ይመላለሳል።
15፤ታካች፡ሰው፡እጁን፡ወደ፡ወጭት፡ያጠልቃል፤ወደ፡አፉም፡ይመልሳት፡ዘንድ፡ለርሱ፡ድካም፡ነው።
16፤ታካች፡ሰው፡በጥበብ፡ከሚመልሱ፡ከሰባት፡ሰዎች፡ይልቅ፡ለራሱ፡ጠቢብ፡የኾነ፡ይመስለዋል።
17፤ዐልፎ፡በሌላው፡ጥል፡የሚደባለቅ፡ውሻን፡በዥራቱ፡እንደሚይዝ፡ነው።
18፤ትንታግንና፡ፍላጻን፡ሞትንም፡እንደሚወረውር፡እንደ፡እብድ፡ሰው፥
19፤ባልንጀራውን፡የሚያታልል፦በጨዋታ፡አደረግኹት፡የሚል፡ሰውም፡እንዲሁ፡ነው።
20፤ዕንጨት፡ባለቀ፡ጊዜ፡እሳት፡ይጠፋል፤ዦሮ፡ጠቢ፡በሌለበትም፡ዘንድ፡ጠብ፡ጸጥ፡ይላል።
21፤ከሰል፡ፍምን፡ዕንጨትም፡እሳትን፡እንዲያበዛ፥እንዲሁ፡ቍጡ፡ሰው፡ጠብን፡ያበዛል።
22፤የዦሮ፡ጠቢ፡ቃል፡እንደ፡ጣፋጭ፡መብል፡ነው፥ርሱም፡እስከሆድ፡ጕርጆች፡ድረስ፡ይወርዳል።
23፤ክፋት፡በልቡ፡ሳለ፡ፍቅርን፡የሚናገር፡ከንፈር፡በብር፡ዝገት፡እንደ፡ተለበጠ፡የሸክላ፡ዕቅ፡ነው።
24፤ጠላት፡በከንፈሩ፡ተስፋ፡ይሰጣል፥በልቡ፡ግን፡ተንኰልን፡ያኖራል።
25፤በልቡ፡ሰባት፡ርኵሰት፡አለበትና፡በቃሉ፡አሳምሮ፡ቢናገርኽ፡አትመነው።
26፤ጠላትነቱን፡በተንኰል፡የሚሸሽግ፥ክፋቱ፡በጉባኤ፡መካከል፡ይገለጣል።
27፤ጕድጓድን፡የሚምስ፡ይወድቅበታል፤ድንጋይንም፡የሚያንከባልል፡ይገለበጥበታል።
28፤ሐሰተኛ፡ምላስ፡ያቈሰላቸውን፡ሰዎች፡ይጠላል፤ልዝብ፡አፍም፡ጥፋትን፡ያመጣል።
_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡27።______________
ምዕራፍ፡27፤(3)፡
1፤ቀን፡የሚያመጣውን፡ምን፡እንደ፡ኾነ፡አታውቅምና፡ነገ፡በሚኾነው፡አትመካ።
2፤ሌላ፡ያመስግንኽ፡እንጂ፡አፍኽ፡አይደለም፤ባዕድ፡ሰው፡እንጂ፡ከንፈርኽ፡አይደለም።
3፤ድንጋይ፡ከባድ፡ነው፥አሸዋም፡ሸክሙ፡ጽኑ፡ነው፤ከኹለቱ፡ግን፡የሰነፍ፡ቍጣ፡ይከብዳል።
4፤ቍጣ፡ምሕረት፡የሌለው፡ነው፥መዓትም፡እንደ፡ጐርፍ፡ነው፤በቅንአት፡ፊት፡ግን፡ማን፡ይቆማል፧
5፤የተገለጠ፡ዘለፋ፡ከተሰወረ፡ፍቅር፡ይሻላል።
6፤የወዳጅ፡ማቍሰል፡የታመነ፡ነው፤የጠላት፡መሳም፡ግን፡የበዛ፡ነው።
7፤የጠገበች፡ነፍስ፡የማር፡ወለላ፡ትረግጣለች፤ለተራበች፡ነፍስ፡ግን፡የመረረ፡ነገር፡ዅሉ፡ይጣፍጣታል።
8፤ስፍራውን፡የሚተው፡ሰው፥ቤቱን፡ትቶ፡እንደሚበር፟፡ወፍ፡ነው።
9፤ሽቱና፡ዕጣን፡ልብን፡ደስ፡ያሠኛሉ፤እንዲሁ፡ነፍስ፡በወዳጁ፡ምክር፡ደስ፡ይላታል።
10፤ወዳጅኽንና፡የአባትኽን፡ወዳጅ፡አትተው፤በመከራኽም፡ቀን፡ወደወንድምኽ፡ቤት፡አትግባ፤የቀረበ፡ወዳጅ፡ከ ራቀ፡ወንድም፡ይሻላል።
11፤ልጄ፡ሆይ፥ጠቢብ፡ኹን፥ልቤንም፡ደስ፡አሠኘው፥ለሚሰድበኝ፡መልስ፡መስጠት፡ይቻለኝ፡ዘንድ።
12፤ብልኅ፡ሰው፡ክፉን፡አይቶ፡ይሸሸጋል፤አላዋቂዎች፡ግን፡ዐልፈው፡ይጐዳሉ።
13፤ለማያውቀው፡ከተዋሰ፡ሰው፡ልብሱን፡ውሰድ፥ለእንግዳ፡የተዋሰውንም፡ርሱን፡ዐግተው።
14፤ባልንጀራውን፡በታላቅ፡ቃል፡ማለዳ፡የሚባርክ፡ሰው፡እንደሚራገም፡ያኽል፡ነው።
15፤በዝናብ፡ቀን፡የሚያንጠባጥብ፡ቤትና፡ጠበኛ፡ሴት፡አንድ፡ናቸው፤
16፤ርሷንም፡መከልከል፡ነፍስን፡መከልከልና፡ዘይትን፡በቀኝ፡እጅ፡መጨበጥ፡ነው።
17፤ብረት፡ብረትን፡ይስለዋል፥ሰውም፡ባልንጀራውን፡ይስላል።
18፤በለሱን፡የጠበቀ፡ፍሬዋን፡ይበላል፥ጌታውንም፡የሚጠብቅ፡ይከብራል።
19፤ፊት፡በውሃ፡ላይ፡ለፊት፡እንደሚታይ፥እንዲሁ፡የሰው፡ልብ፡ለሰው፡ይታያል።
20፤ሲኦልና፡ጥፋት፡እንዳይጠግቡ፥እንዲሁ፡የሰው፡ዐይን፡አይጠግብም።
21፤ብር፡በከውር፡ወርቅም፡በማቅለጫ፡ይፈተናል፤ሰውም፡በሚያመሰገኑት፡ሰዎች፡አፍ፡ይፈተናል።
22፤ሰነፍን፡በሙቀጫ፡ውስጥ፡ከእኽል፡ጋራ፡በዘነዘና፡ብትወቅጠው፥ስንፍናው፡ከርሱ፡አይርቅም።
23፤የበጎችኽን፡መልክ፡አስተውለኽ፡ዕወቅ፥በከብቶችኽም፡ላይ፡ልብኽን፡አኑር፤
24፤ባለጠግነት፡ለዘለዓለም፡አይኖርምና፥ዘውድም፡ለትውልድ፡ዅሉ፡አይጸናምና።
25፤ደረቅ፡ሣር፡በታጨደ፡ጊዜ፥ዐዲስ፡ለምለም፡በታየ፡ጊዜ፥ከተራራውም፡ቡቃያ፡በተሰበሰበ፡ጊዜ፥
26፤በጎች፡ለልብስኽ፡ፍየሎችም፡የዕርሻ፡ዋጋ፡ይኾናሉ።
27፤ለሲሳይኽ፡ለቤተ፡ሰቦችኽም፡ሲሳይ፡ለገረዶችኽም፡ምግብ፡የፍየል፡ወተት፡ይበቃል።
_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡28።______________
ምዕራፍ፡28፤(4)፡
1፤ኃጥእ፡ማንም፡ሳያሳድደው፡ይሸሻል፤ጻድቅ፡ግን፡እንደ፡አንበሳ፡ያለፍርሀት፡ይኖራል።
2፤ስለአገሪቱ፡ዐመፀኝነት፡አለቃዎቿ፡ብዙ፡ኾኑ፤በአስተዋይና፡በዐዋቂ፡ሰው፡ግን፡ዘመኗ፡ይረዝማል።
3፤ድኻዎችን፡የሚያስጨንቅ፡ምስኪን፡ሰው፡እኽልን፡እንደሚያጠፋ፡እንደ፡ዶፍ፡ዝናብ፡ነው።
4፤ሕግን፡የሚተዉ፡ሰዎች፡ኃጥኣንን፡ያመሰግናሉ፤ሕግ፡ጠባቂዎች፡ግን፡ይጠሏቸዋል።
5፤ክፉዎች፡ሰዎች፡ፍርድን፡አያስተውሉም፤እግዚአብሔርን፡የሚሹ፡ግን፡ዅሉን፡ያስተውላሉ።
6፤በጠማማ፡መንገድ፡ከሚኼድ፡ባለጠጋ፡ያለነውር፡የሚኼድ፡ድኻ፡ይሻላል።
7፤ሕግን፡የሚጠብቅ፡አስተዋይ፡ልጅ፡ነው፤ምናምንቴዎችን፡የሚከተል፡ግን፡አባቱን፡ያሳፍራል።
8፤በዐራጣ፡ብዛትና፡በቅሚያ፡ሀብቱን፡የሚያበዛ፡ለድኻ፡ለሚራራ፡ያከማችለታል።
9፤ሕግን፡ከመስማት፡ዦሮውን፡የሚመልስ፡ጸሎቱ፡አስጸያፊ፡ናት።
10፤ቅኖችን፡በክፉ፡መንገድ፡የሚያስት፥ርሱ፡ወደ፡ጕድጓዱ፡ይወድቃል፤ፍጹማን፡ግን፡መልካም፡ነገርን፡ይወርሳ ሉ።
11፤ባለጠጋ፡ሰው፡ለራሱ፡ጠቢብ፡የኾነ፡ይመስለዋል፤አስተዋይ፡ድኻ፡ግን፡ይመረምረዋል።
12፤ጻድቃን፡ድል፡ባደረጉ፡ጊዜ፡ብዙ፡ክብር፡አለ፤ኃጥኣን፡ከፍ፡ከፍ፡ባሉ፡ጊዜ፡ግን፡ሰው፡ይሸሸጋል።
13፤ኀጢአቱን፡የሚሰውር፡አይለማም፤የሚናዘዝባትና፡የሚተዋት፡ግን፡ምሕረትን፡ያገኛል።
14፤ዅልጊዜ፡የሚፈራ፡ሰው፡ምስጉን፡ነው፤ልቡን፡የሚያጸና፡ግን፡በክፉ፡ላይ፡ይወድቃል።
15፤በድኻ፡ሕዝብ፡ላይ፡የሚገዛ፡ክፉ፡መኰንን፡እንደሚያገሣ፡አንበሳና፡እንደ፡ተራበ፡ድብ፡ነው።
16፤አእምሮ፡የጐደለው፡መኰንን፡ትልቅ፡ግፈኛ፡ነው፤ግፍን፡የሚጠላ፡ግን፡ብዙ፡ዘመን፡ይኖራል።
17፤የሰው፡ደም፡ያለበት፡ሰው፡እንደ፡ጕድጓድ፡ይሸሻል፥ማንም፡አያስጠጋውም።
18፤በቅንነት፡የሚኼድ፡ይድናል፤በጠማምነት፡የሚኼድ፡ግን፡ወዲያው፡ይወድቃል።
19፤ምድሩን፡የሚያርስ፡እንጀራ፡ይጠግባል፤ምናምንቴዎችን፡የሚከተል፡ግን፡ድኽነት፡ይሞላበታል።
20፤የታመነ፡ሰው፡እጅግ፡ይባረካል፤ባለጠጋ፡ለመኾን፡የሚቸኵል፡ግን፡ሳይቀጣ፡አይቀርም።
21፤ማድላት፥በቍራሽ፡እንጀራም፡መበደል፡መልካም፡አይደለም።
22፤ምቀኛ፡ሰው፡ባለጠጋ፡ለመኾን፡ይቸኵላል፥ችጋርም፡እንደሚመጣበት፡አያውቅም።
23፤ምላሱን፡ከሚያጣፍጥ፡ይልቅ፡ሰውን፡የሚገሥጽ፡በዃላ፡ሞገስ፡ያገኛል።
24፤ከአባቱና፡ከእናቱ፡የሚሰርቅ፦ኀጢአትን፡አልሠራኹም፡የሚልም፡የአጥፊ፡ባልንጀራ፡ነው።
25፤የሚጐመዥ፡ሰው፡ክርክርን፡ያነሣሣል፤በእግዚአብሔር፡የሚታመን፡ግን፡ይጠግባል።
26፤በገዛ፡ልቡ፡የሚታመን፡ሰው፡ሰነፍ፡ነው፤በጥበብ፡የሚኼድ፡ግን፡ይድናል።
27፤ለድኻ፡የሚሰጥ፡አያጣም፤ዐይኖቹን፡የሚጨፍን፡ግን፡እጅግ፡ይረገማል።
28፤ኃጥኣን፡በተነሡ፡ጊዜ፡ሰዎች፡ይሸሸጋሉ፤እነርሱ፡በጠፉ፡ጊዜ፡ግን፡ጻድቃን፡ይበዛሉ።
_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡29።______________
ምዕራፍ፡29፤(5)፡
1፤ብዙ፡ጊዜ፡ተዘልፎ፡ዐንገቱን፡ያደነደነ፡ድንገት፡ይሰበራል፥ፈውስም፡የለውም።
2፤ጻድቃን፡በበዙ፡ጊዜ፡ሕዝብ፡ደስ፡ይለዋል፤ኃጥኣን፡በሠለጠኑ፡ጊዜ፡ግን፡ሕዝብ፡ያለቅሳል።
3፤ጥበብን፡የወደደ፡ሰው፡አባቱን፡ደስ፡ያሠኛል፤ጋለሞታዎችን፡የሚከተል፡ግን፡ሀብቱን፡ያጠፋል።
4፤ንጉሥ፡በፍርድ፡አገሩን፡ያጸናል፤መማለጃ፡የሚወድ፟፡ግን፡ያፈርሰዋል።
5፤ወዳጁን፡በለዘበ፡ቃል፡የሚናገር፡ሰው፡ለእግሩ፡መርበብን፡ይዘረጋል።
6፤በክፉ፡ሰው፡ዐመፃ፡ወጥመድ፡ይገኛል፤ጻድቅ፡ግን፡ደስ፡ይለዋል፥እልልም፡ይላል።
7፤ጻድቅ፡የድኻዎችን፡ፍርድ፡ይመለከታል፤ኃጥእ፡ግን፡ዕውቀትን፡አያስተውልም።
8፤ፌዘኛዎች፡ከተማቸውን፡ያቃጥላሉ፤ጠቢባን፡ግን፡ቍጣን፡ይመልሳሉ።
9፤ጠቢብ፡ከሰነፍ፡ጋራ፡ቢጣላ፥ሰነፍ፡ወይም፡ይቈጣል፡ወይም፡ይሥቃል፥ዕረፍትም፡የለም።
10፤ደምን፡ለማፍሰስ፡የሚሹ፡ሰዎች፡ፍጹሙን፡ሰው፡ይጠላሉ፥ደግሞም፡የቅኑን፡ሰው፡ነፍስ፡ይሻሉ።
11፤ሰነፍ፡ሰው፡ቍጣውን፡ዅሉ፡ያወጣል፤ጠቢብ፡ግን፡በውስጡ፡ያስቀረዋል።
12፤መኰንን፡ሐሰተኛ፡ነገርን፡ቢያደምጥ፥ከርሱ፡በታች፡ያሉት፡ዅሉ፡ዐመፅኞች፡ይኾናሉ።
13፤ድኻና፡ግፈኛ፡ተገናኙ፤እግዚአብሔር፡የኹለቱንም፡ዐይን፡ያበራል።
14፤ለድኻ፡በእውነት፡የሚፈርድ፡ንጉሥ፥ዙፋኑ፡ለዘለዓለም፡ይጸናል።
15፤በትርና፡ተግሣጽ፡ጥበብን፡ይሰጣሉ፤ያልተቀጣ፡ብላቴና፡ግን፡እናቱን፡ያሳፍራል።
16፤ኃጥኣን፡ሲበዙ፡ኀጢአት፡ትበዛለች፤ጻድቃን፡ግን፡ውደቀታቸውን፡ያያሉ።
17፤ልጅኽን፡ቅጣ፡ዕረፍትንም፡ይሰጥኻል፤ለነፍስኽም፡ተድላን፡ይሰጣታል።
18፤ራእይ፡ባይኖር፡ሕዝብ፡መረን፡ይኾናል፤ሕግን፡የሚጠብቅ፡ግን፡የተመሰገነ፡ነው።
19፤ባሪያ፡በቃል፡አይገሠጽም፤ቢያስተውል፡እንኳ፡አይመልስምና።
20፤በቃሉ፡የሚቸኵለውን፡ሰው፡ብታይ፥ከርሱ፡ይልቅ፡ለሰነፍ፡ተስፋ፡አለው።
21፤ባሪያውን፡ከሕፃንነቱ፡ዠምሮ፡በማቀማጠል፡የሚያሳድግ፡የዃላ፡ዃላ፡እንደ፡ጌታ፡ያደርገዋል።
22፤ቍጡ፡ሰው፡ክርክርን፡ያነሣሣል።ወፈፍተኛ፡ሰውም፡ኀጢአትን፡ያበዛል።
23፤ሰውን፡ትዕቢቱ፡ያዋርደዋል፤መንፈሱን፡የሚያዋርድ፡ግን፡ክብርን፡ይቀበላል።
24፤ከሌባ፡ጋራ፡የሚካፈል፡ነፍሱን፡ይጠላል፤መርገምን፡ይሰማል፥ነገር፡ግን፥ምንም፡አይገልጥም።
25፤ሰውን፡መፍራት፡ወጥመድ፡ያመጣል፤በእግዚአብሔር፡የሚታመን፡ግን፡ርሱ፡ይጠበቃል።
26፤ብዙ፡ሰዎች፡የሹምን፡ፊት፡ይሻሉ፤የሰው፡ፍርድ፡ግን፡ከእግዚአብሔር፡ዘንድ፡ነው።
27፤ኀጢአተኛ፡በጻድቃን፡ዘንድ፡አስጸያፊ፡ነው፤በቀና፡መንገድ፡የሚኼደውም፡በኃጥኣን፡ዘንድ፡አስጸያፊ፡ነው ።
_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡30።______________
ምዕራፍ፡30፤(6)፡
1፤የማሣ፡አገር፡ሰው፡የያቄ፡ልጅ፡የአጉር፡ቃል፡ሰውየው፡ለኢቲኤልና፡ለኡካል፡እንደዚህ፡ይናገራል።
2፤እኔ፡በእውነት፡ከሰው፡ዅሉ፡ይልቅ፡ደንቈሮ፡ነኝ፥የሰውም፡ማስተዋል፡የለብኝም።
3፤ጥበብንም፡አልተማርኹም፥ቅዱሱንም፡አላወቅኹትም።
4፤ወደ፡ሰማይ፡የወጣ፡የወረደስ፡ማን፡ነው፧ነፋስንስ፡በእጁ፡የጨበጠ፡ማን፡ነው፧ውሃንስ፡በልብሱ፡የቋጠረ፡ማ ን፡ነው፧የምድርን፡ዳርቻ፡ዅሉ፡ያጸና፡ማን፡ነው፧ይህን፡ታውቅ፡እንደ፡ኾንኽ፥ስሙ፡ማን፡የልጁስ፡ስም፡ማን፡ ነው፧
5፤የእግዚአብሔር፡ቃል፡ዅሉ፡ተፈትናለች፤ርሱ፡ለሚታመኑት፡ጋሻ፡ነው።
6፤እንዳይዘልፍኽ፥ሐሰተኛም፡እንዳትኾን፡በቃሉ፡አንዳች፡አትጨምር።
7፤ኹለትን፡ነገር፡ከአንተ፡እሻለኹ፥ሳልሞትም፡አትከልክለኝ፤
8፤ከንቱነትንና፡ሐሰተኛነትን፡ከእኔ፡አርቃቸው፤ድኽነትንና፡ባለጠግነትን፡አትስጠኝ፤ነገር፡ግን፥የሚያስፈል ገኝን፡እንጀራ፡ስጠኝ፥
9፤እንዳልጠግብ፡እንዳልክድኽም፦እግዚአብሔርስ፡ማን፡ነው፧እንዳልል፤ድኻም፡እንዳልኾን፡እንዳልሰርቅም፥በአ ምላኬም፡ስም፡በሐሰት፡እንዳልምል።
10፤እንዳይሰድብኽ፡በደለኛም፡እንዳትኾን፡ባሪያን፡በጌታው፡ፊት፡አትማ።
11፤አባቱን፡የሚረግም፥እናቱንም፡የማይባርክ፡ትውልድ፡አለ።
12፤ለራሱ፡ንጹሕ፡የኾነ፡የሚመስለው፡ከርኵሰቱ፡ያልጠራ፡ትውልድ፡አለ።
13፤ከፍ፡ከፍ፡ያሉ፡ዐይኖች፡ያሉት፥ሽፋሽፍቶቹም፡ወደ፡ላይ፡የሚያዩ፡ትውልድ፡አለ።
14፤ድኻዎችን፡ከምድር፡ላይ፡ችግረኛዎችንም፡ከሰው፡መካከል፡ያጠፋና፡ይጨርስ፡ዘንድ፡ጥርሶቹ፡ሰይፍ፡መንጋጎ ቹም፡ካራ፡የኾኑ፡ትውልድ፡አለ።
15፤ዐልቅት፦ስጠን፡ስጠን፡የሚሉ፡ኹለት፡ሴቶች፡ልጆች፡አሉት።ሦስቱ፡የማይጠግቡ፥አራቱም፦በቃን፡የማይሉ፡ና ቸው፤
16፤እነርሱም፡ሲኦልና፡የማትወልድ፡ማሕፀን፡ውሃ፡የማትጠግብ፡ምድርና፦በቃኝ፡የማትል፡እሳት፡ናቸው።
17፤በአባቷ፡የምታላግጥን፡የእናቷንም፡ትእዛዝ፡የምትንቅን፡ዐይን፡የሸለቆ፡ቍራዎች፡ይጐጠጕጧታል፥አሞራዎች ም፡ይበሏታል።
18፤ሦስት፡ነገር፡ይገርመኛል፥አራተኛውንም፡ከቶ፡አላስተውለውም።
19፤እነርሱም፡የንስር፡መንገድ፡በሰማይ፥የእባብ፡መንገድ፡በድንጋይ፡ላይ፥የመርከብ፡መንገድ፡በባሕር፡ላይ፥ የሰውም፡መንገድ፡ከቈንዦ፡ጋራ፡ናቸው።
20፤እንዲሁ፡በልታ፡አፏን፡የምታብስ፦አንዳች፡ክፉ፡ነገር፡አላደረግኹም፡የምትልም፡የአመንዝራ፡ሴት፡መንገድ ፡ናት።
21፤በሦስት፡ነገር፡ምድር፡ትናወጣለች፥አራተኛውንም፡ትሸከም፡ዘንድ፡አይቻላትም።
22፤ባሪያ፡በነገሠ፡ጊዜ፡ሰነፍም፡እንጀራ፡በጠገበ፡ጊዜ፥
23፤የተጠላች፡ሴት፡ባል፡ባገኘች፡ጊዜ፥ሴት፡ባሪያም፡እመቤቷን፡በወረሰች፡ጊዜ።
24፤በምድር፡ላይ፡አራት፡ጥቃቅን፡ፍጥረቶች፡አሉ፤እነርሱ፡ግን፡እጅግ፡ጠቢባን፡ናቸው፤
25፤ገብረ፡ጕንዳን፡ኀይል፡የሌላቸው፡ሕዝቦች፡ናቸው፥ነገር፡ግን፥በበጋ፡መኗቸውን፡ይሰበስባሉ።
26፤ሽኮኮዎች፡ያልበረቱ፡ሕዝቦች፡ናቸው፥ቤታቸውን፡ግን፡በቋጥኝ፡ድንጋይ፡ውስጥ፡ያደርጋሉ።
27፤አንበጣዎች፡ንጉሥ፡የላቸውም፥ዅላቸው፡ግን፡በመልካም፡ሥርዐት፡ይኼዳሉ።
28፤እንሽላሊት፡በእጅ፡ይያዛል፥በነገሥታት፡ግቢ፡ግን፡ይኖራል።
29፤መልካም፡አረማመድን፡የሚራመዱ፡ሦስት፡ፍጥረቶች፡አሉ፥አራተኛውም፡መልካም፡አካኼድን፡ይኼዳል፤
30፤የአንበሳ፡ደቦል፡ከእንስሳ፡ዅሉ፡የሚበረታ፥የማይመለስ፥እንስሳንም፡የማይፈራ፤
31፤በእንስቶች፡መካከል፡በድፍረት፡የሚራመድ፡አውራ፡ዶሮ፤መንጋን፡የምመራ፡አውራ፡ፍየል፤በሕዝብ፡ፊት፡በግ ልጥ፡የሚናገር፡ንጉሥ።
32፤ከፍ፡ከፍ፡ስትል፡ስንፍናን፡ያደረግኽ፡እንደ፡ኾነ፥ክፉም፡ያሰብኽ፡እንደ፡ኾነ፥እጅኽን፡በአፍኽ፡ላይ፡ጫ ን።
33፤ወተት፡መግፋት፡ቅቤን፡ያወጣል፥አፍንጫንም፡መጭመቅ፡ደምን፡ያወጣ፤እንዲሁም፡ቍጣን፡መጐተት፡ጠብን፡ያወ ጣል።
_______________መጽሐፈ፡ምሳሌ፡(መጽሐፈ፡ተግሣጽ)፥ምዕራፍ፡31።______________
ምዕራፍ፡31፤(6)፡
1፤እናቱ፡ርሱን፡ያስተማረችበት፡የማሣ፡ንጉሥ፡የልሙኤል፡ቃል።
2፤ልጄ፡ሆይ፥ምንድር፡ነው፧የሆዴ፡ልጅ፡ሆይ፥ምንድር፡ነው፧የስእለቴ፡ልጅ፡ሆይ፥ምንድር፡ነው፧
3፤ጕልበትኽን፡ለሴቶች፡አትስጥ፥መንገድኽንም፡ነገሥታትን፡ለሚያጠፉ።
4፤ለነገሥታት፡አይገ፟ባ፟ም፥ልሙኤል፡ሆይ፥ነገሥታት፡የወይን፡ጠጅ፡ይጠጡ፡ዘንድ፡አይገ፟ባ፟ም።መሳፍንትም፦ ብርቱ፡መጠጥ፡ወዴት፡ነው፧ይሉ፡ዘንድ፤
5፤እንዳይጠጡና፡ሕግን፡እንዳይረሱ፥የድኻ፡ልጆችንም፡ፍርድ፡እንዳያጐድሉ።
6፤ለጥፋት፡ለቀረበው፡ሰው፡ብርቱ፡መጠጥ፡ስጡት፥ነፍሱ፡ለመረረውም፡የወይን፡ጠጅ፡ስጡት፤
7፤ይጠጣ፡ድኽነቱንም፡ይርሳ፥ጕስቍልናውንም፡ከእንግዲህ፡ወዲህ፡አያስብ።
8፤አፍኽን፡ስለ፡ዲዳው፡ክፈት፥ተስፋ፡ስለሌላቸውም፡ዅሉ፡ተፋረድ።
9፤አፍኽን፡ክፈት፥በእውነትም፡ፍረድ፤ለድኻና፡ለምስኪን፡ፍረድ።
10፤ልባም፡ሴትን፡ማን፡ሊያገኛት፡ይችላል፧ዋጋዋ፡ከቀይ፡ዕንቍ፡እጅግ፡ይበልጣል።
11፤የባሏ፡ልብ፡ይታመንባታል።ምርኮም፡አይጐድልበትም።
12፤ዕድሜዋን፡ሙሉ፡መልካም፡ታደርግለታለች፥ክፉም፡አታደርግም።
13፤የበግ፡ጠጕርና፡የተልባ፡እግር፡ትፈልጋለች፥በእጆቿም፡ደስ፡ብሏት፡ትሠራለች።
14፤ርሷ፡እንደ፡ነጋዴ፡መርከብ፡ናት፤ከሩቅ፡አገር፡ምግቧን፡ትሰበስባለች።
15፤ገና፡ሌሊት፡ሳለ፡ትነሣለች፡ለቤቷም፡ሰዎች፡ምግባቸውን፥ለገረዶቿም፡ተግባራቸውን፡ትሰጣለች።
16፤ዕርሻንም፡ተመልክታ፡ትገዛለች፤ከእጇም፡ፍሬ፡ወይን፡ትተክላለች።
17፤ወገቧን፡በኀይል፡ትታጠቃለች፥ክንዷንም፡ታበረታለች።
18፤ንግዷ፡መልካም፡እንደ፡ኾነ፡ትመለከታለች፤መብራቷ፡በሌሊት፡አይጠፋም።
19፤እጇን፡ወደ፡አመልማሎ፡ትዘረጋለች፥ጣቶቿም፡እንዝርትን፡ይይዛሉ።
20፤እጇን፡ወደ፡ድኻ፡ትዘረጋለች፥ወደ፡ችግረኛም፡እጇን፡ትሰዳ፟ለች።
21፤ለቤቷ፡ሰዎች፡ከበረዶ፡ብርድ፡የተነሣ፡አትፈራም፥የቤቷ፡ሰዎች፡ዅሉ፡ዕጥፍ፡ድርብ፡የለበሱ፡ናቸውና።
22፤ለራሷም፡ግብረ፡መርፌ፡ስጋጃ፡ትሠራለች፡ጥሩ፡በፍታና፡ቀይ፡ግምጃ፡ትለብሳለች።
23፤ባሏ፡በአገር፡ሽማግሌዎች፡መካከል፡በሸንጎ፡በተቀመጠ፡ጊዜ፡በበር፡የታወቀ፡ይኾናል።
24፤የበፍታ፡ቀሚስ፡እየሠራች፡ትሸጣለች፥ለነጋዴም፡ድግ፡ትሸጣለች።
25፤ብርታትና፡ከበሬታ፡ልብሷ፡ነው፤በዃላም፡ዘመን፡ላይ፡ትሥቃለች።
26፤አፏን፡በጥበብ፡ትከፍታለች፤የርኅራኄም፡ሕግ፡በምላሷ፡አለ።
27፤የቤቷንም፡ሰዎች፡አካኼድ፡በደኅና፡ትመለከታለች፥የሀኬትንም፡እንጀራ፡አትበላም።
28፤ልጆቿ፡ይነሣሉ፥ምስጋናዋንም፡ይናገራሉ፤ባሏ፡ደግሞ፡እንዲህ፡ብሎ፡ያመሰግናታል።
29፤መልካም፡ያደረጉ፡ብዙ፡ሴቶች፡አሉ፥አንቺ፡ግን፡ከዅሉ፡ትበልጫለሽ።
30፤ውበት፡ሐሰት፡ነው፥ደም፡ግባትም፡ከንቱ፡ነው፤እግዚአብሔርን፡የምትፈራ፡ሴት፡ግን፡ርሷ፡ትመሰገናለች።
31፤ከእጇ፡ፍሬ፡ስጧት፥ሥራዎቿም፡በሸንጎ፡ያመስግኗት፨

http://www.gzamargna.net